നാരായണാ ഹരേ നാരായണാ ഹരേ
നാരായണനാമം ഭക്ത്യാ ജപിക്കുവാന്‍
തോന്നേണമേ സദാ നാരായണാ ഹരേ
ധര്‍മ്മസംസ്ഥാപനത്തിന്നായി കാലടി
ക്ഷേത്രത്തില്‍ വാഴും ഹരിഹരനന്ദനാ
ശ്രീഭൂതനാഥാ ശരണം മണികണ്‌ഠാ
അഭയമേകണേ അയ്യപ്പാ പാഹിമാം
കാലടിക്ഷേത്രത്തില്‍ വാഴും ഭഗവാന്റെ
കാലടികള്‍മാത്രമാണെനിക്കാശ്രയം
കാലാരിസേവ്യ മുകുന്ദ ദയാനിധേ
കാലടിശ്രീമഹാവിഷ്‌ണോ നമോസ്‌തുതേ
അര്‍ത്ഥപുത്രകളത്രാദി ബന്ധുക്കളും
വ്യര്‍ത്ഥമാം മൃത്യുകാലത്തിലാര്‍ക്കുമേ
ആര്‍ത്തബന്ധോ തദാപാലയമാം വിഭോ
കാലടിശ്രീമഹാവിഷ്‌ണോ നമോസ്‌തുതേ
ആശ്രിതവത്സല കാരുണ്യവാരിധേ
ആശ്രയമങ്ങയല്ലാതെയില്ലാര്‍ക്കുമേ
വിശ്വംഭര ജയ ഭക്തജനപ്രിയ
കാലടിശ്രീമഹാവിഷ്‌ണോ നമോസ്‌തുതേ
ഇക്കലികാലത്തില്‍ നാമസങ്കീര്‍ത്തനം
മുക്തിപ്രദമെന്നു ചൊല്ലുന്നു സജ്ജനം
ഭക്തപ്രിയഹരേ പാഹിമാം സര്‍വ്വദാ
കാലടിശ്രീമഹാവിഷ്‌ണോ നമോസ്‌തുതേ
ഈശ്വരാനുഗ്രഹമില്ലെങ്കിലാര്‍ക്കുമീ
വിശ്വത്തില്‍ ജീവിതം ദുഃഖപ്രദം ഹരേ
വിശ്വേശ്വരാ ഭക്തവത്സല പാഹിമാം
കാലടിശ്രീമഹാവിഷ്‌ണോ നമോസ്‌തുതേ
ഉഗ്രനരസിംഹരൂപം ധരിച്ചുടന്‍
വിഗ്രഹത്തിങ്കല്‍ ഹിരണ്യകശിപുവെ
നിഗ്രഹിച്ച പ്രഹ്‌ളാദപ്രിയ പാഹിമാം
കാലടിശ്രീമഹാവിഷ്‌ണോ നമോസ്‌തുതേ
ഊനമാക്കേണം ദുരിതങ്ങളൊക്കേയും
ജനിമൃതിദുഃഖമാപദ്‌ഗണങ്ങളും
ആനന്ദമൂര്‍ത്തേ ജനാര്‍ദ്ദനാ മാധവാ
കാലടിശ്രീമഹാവിഷ്‌ണോ നമോസ്‌തുതേ
ഋഗ്‌യജുര്‍സാമവേദപ്രിയ ശ്രീപതേ
ത്വത്‌കഥാശ്രവണ നാമസങ്കീര്‍ത്തനാല്‍
മുക്തിഭവിപ്പാനനുഗ്രഹിക്കേണമേ
കാലടിശ്രീമഹാവിഷ്‌ണോ നമോസ്‌തുതേ
ലൂതത്തിന്‍ വലയില്‍ പെട്ടോരു പ്രാണിപോല്‍
മൃത്യുപാശത്താല്‍ ഞാന്‍ ബദ്ധനാം വേളയില്‍
മൃത്യുഭയം തീര്‍ത്തു രക്ഷിച്ചിടേണമേ
കാലടിശ്രീമഹാവിഷ്‌ണോ നമോസ്‌തുതേ
എന്നും തിരുനാമ മന്ത്രം ജപിക്കുവാന്‍
തോന്നേണമേ സദാ വിഷ്‌ണോ ജഗത്‌പതേ
പന്നഗശായിന്‍ പരംപുരുഷോത്തമ
കാലടിശ്രീമഹാവിഷ്‌ണോ നമോസ്‌തുതേ
ഏകനാമീശന്‍ പലവിധരൂപമായ്‌
ഇക്കണ്ട വിശ്വം ചമച്ചതുമത്ഭുതം
തൃക്കാലിണകളില്‍ ഭക്ത്യാ നമിക്കുന്നേന്‍
കാലടിശ്രീമഹാവിഷ്‌ണോ നമോസ്‌തുതേ
ഐശ്വര്യദായകനാകുമീ ദേവനെ
വിശ്വാസഭക്ത്യാ ഭജിക്കുന്നവര്‍ക്കെല്ലാം
ഈശ്വരാനുഗ്രഹമുണ്ടായ്‌ വരേണമേ
കാലടിശ്രീമഹാവിഷ്‌ണോ നമോസ്‌തുതേ
ഒന്നിനും വയ്യാതവശനായ്‌ ശയ്യയില്‍
ചെന്നുകിടന്നു വലയുന്ന വേളയില്‍
എന്നെക്കനിവോടെ രക്ഷിക്കണേ ഭവാന്‍
കാലടിശ്രീമഹാവിഷ്‌ണോ നമോസ്‌തുതേ
ഓര്‍ക്കിലതിശയം കാലടിക്ഷേത്രത്തിന്‍
മുന്‍കാലാവസ്ഥ പതന,മുത്ഥാനവും
ഒക്കെയുമീശ്വരനിശ്ചയമായ്‌ വരാം
കാലടിശ്രീമഹാവിഷ്‌ണോ നമോസ്‌തുതേ
ഔഷധസേവയാല്‍ രോഗവുമെന്നപോല്‍
വിഷ്‌ണുസേവയാല്‍ ദുരിതവും നഷ്ടമാം
ശേഷശായിന്‍ മധുസൂദന പാഹിമാം
കാലടിശ്രീമഹാവിഷ്‌ണോ നമോസ്‌തുതേ
അംബുജലോചനാ നാരായണാ ഹരേ
തമ്പുരാനേ മമ സര്‍വ്വാപരാധവും
അമ്പിനോടെല്ലാം ക്ഷമിച്ചീടണേ ഭവാന്‍
കാലടിശ്രീമഹാവിഷ്‌ണോ നമോസ്‌തുതേ
അന്നന്നുവന്നീടുമാപത്തൊഴിച്ചെന്നെ
എന്നും തുണയ്‌ക്കേണമാശ്രിതവത്സല
എന്നും ഭജിക്കുന്നു ഞാനുമിക്കീര്‍ത്തനാല്‍
കാലടിശ്രീമഹാവിഷ്‌ണോ നമോസ്‌തുതേ
വിഷ്‌ണുനാമാര്‍ച്ചനയെന്നൊരിക്കീര്‍ത്തനം
വിഷ്‌ണുമൂര്‍ത്തേ ഭവദ്‌പാദാംബുജങ്ങളില്‍
ഭക്ത്യാവണങ്ങി സമര്‍പ്പിച്ചീടുന്നു ഞാന്‍
കാലടിശ്രീമഹാവിഷ്‌ണോ നമോസ്‌തുതേ
ഏഴുപന്തീരാണ്ടുകാലമീഭൂമിയില്‍
വാഴുവാന്‍ യോഗമുണ്ടായൊരെന്‍ മാനസേ
വാഴ്‌ക സദാ ഭവാന്‍ സദ്‌ഗതിയേകണേ
കാലടിശ്രീമഹാവിഷ്‌ണോ നമോസ്‌തുതേ
കാലടിക്ഷേത്രത്തിന്‍ സാന്നിദ്ധ്യമുള്ളൊരു
വിഘ്‌നേശ്വരനും ഹരിഹരപുത്രനും
കാരുണ്യമോടെന്റെ ജീവിതം ധന്യമായ്‌-
ത്തീരാനനുഗ്രഹിച്ചേകണേ മംഗളം
25.12.2006, 1182 ധനു 10 തിങ്കള്‍
No comments:
Post a Comment